Samkomulag – Arna Guðný Valsdóttir flytur sönggjörning í Safnasafninu

Samkomulag – Arna Guðný Valsdóttir flytur sönggjörning í Safnasafninu

Samkomulag – Arna Guðný Valsdóttir flytur sönggjörning í Safnasafninu

Arna Guðný Valsdóttir flytur sönggjörning með verki sínu Samastaður laugardaginn 14.ágúst 2021 frá kl. 13.00 – 16.00 í Safnasafninu á Svalbarðsströnd.
Gjörningurinn felst í því að hún fer inn í vídeó/sönginnsetningu sína í Safnasafninu og reynir að ná samkomulagi og samhljóm við þær raddir sem þar eru fyrir. Gjörningurinn er án formlegs upphafs og endis og geta gestir stjórnað hvort og hve lengi þeir dvelja við hann.
Safnasafnið hýsir í sumar útgáfu af söngverki eftir Örnu en í því beitir hún einfaldri tækni til að ná sambandi við sjálfa sig í gengum samsöng og mátar sig í leiðinni inn í umhverfið.
Lagið sem verkið byggir á var upphaflega samið fyrir samsýningu í Hoorn Í Hollandi árið 1988. Arna ferðaðist um í bænum þar sem sýningrýmið var og inni á sýningunni, hreiðraði um sig og flutti þetta lita lag með handhelda Sony kassettu upptökutækinu sínu. Tækið gaf henni færi á að syngja inn, spóla til baka, spila lagið og radda með upptökunni. Hún pakkaði síðan saman og kom sér fyrir á nýjum stað þar sem hún endurtók lagið.
Verk þetta hefur Arna síðan ferðast með í gegnum tilveruna og reynt að finna því samastað. Mátað það inn í mismunandi kringumstæður, á þetta heima hér… eða kannski hér?
 
Upptakan sem nú er til sýnis í Safnasafninu er frá árinu 2015 en þá dvaldi Arna um stundarsakir í
gestavinnustofu SÍM á Seljavergi. Upptakan er óundirbúinn gjörningur í svefnrými hennar á staðnum.
Nú gerir Arna tilraun til þess að bæta þriðju röddinni við og skoðar hvort hægt er að ná samkomulagi við þær stöllur sem fyrir eru í verkinu.
Söngtextinn var upphaflega saminn á ensku og síðar á íslensku.
This is my home and I like it here
It´s warm, it´s safe
I think I´ll stay here forever
Hérna bý ég og mér líður vel
hér er hlýtt, hér er gott
ég held ég verði hér alltaf

Sumarið 2021 á Safnasafninu

Sumarið 2021 á Safnasafninu

Sumarið 2021 á Safnasafninu

Laugardaginn 8. maí 2021 hefst sumarið í Safnasafninu á Svalbarðseyri. Sumarsýningarnar eru 12 og fjalla um svipbrigðaríka tjáningu í nánd innan félagslegra takmarkana, hvort sem það eru hópar eða einstaklingar sem raða sér upp af skyldleika í listinni.

Ýmsar nýjungar eru á ferðinni í ár sem gestir safnsins kynnast smám saman á ferð sinni um safnið. Börnum og fjölskyldufólki er boðið upp á að taka þátt í Feluleik Safnasafnsins, sem felst í því að finna andlit í sýningarsölum og fá viðurkenningarskjal og glaðning frá safninu fyrir. Ef tækifæri gefast verðar skemmtitækjasýningar úr Bláa boxinu í andyrinu.

Safnasafnið er opið daglega frá kl. 10-17 til 12. september en eftir það er tekið á móti hópum fram eftir hausti. Aðgangseyri er stillt í hóf, vönduð syningarskrá er innifalin og sýnisbækur safneignar eru seldar á vægu verði til styrktar frekari útgáfu bóka.

Á dagskrá sumarsins eru sýningar eftir fjölda listafólks á öllum aldri. Öll einstök með ólíkan bakgrunn.


 

Útiverk og anddyri

Á hlaðinu tekur hávaxni safnvörðurinn bláklæddi á móti gestum. Vörðurinn var gerður af listahópnum Huglist árið 2009 og hefur staðið vaktina síðan í öllum veðrum. Við innganginn er sýnt málverk eftir Eggert Magnússon og höggmynd eftir Hauk Halldórsson sem sýnir guðinn Þór lyfta Miðgarðsormi í kattarlíki. Verk Ragnars Bjarnasonar frá Öndverðarnesi taka síðan fagnandi á móti gestum á hlaði og í anddyri safnsins, en þau eru úr járnbentri steinsteypu sem hann málaði og kom upphaflega fyrir í garði sínum í Eikjuvogi 26 í Reykjavík. Í anddyrinu eru sýnd verk eftir börn í Valsárskóla á Svalbarðsströnd og einnig kynnt verk úr safneign; tréskúlptúrar eftir Aðalheiði S. Eysteinsdóttur, litblýantsteikningar eftir Ásgeir Ísak Kristjánsson, teikningar eftir Nonna Ragnarsson, tréskúlptúrar eftir Ragnar Hermannsson og vatnslitamyndir eftir Svövu Skúladóttur. Við sólpall að vestan er tréskúlptúrinn Bæn eftir Hjalta Skagfjörð Jósefsson.


 

Sólheimar 90 ára

Hið óviðjafnanlega sjálfbæra samfélag að Sólheimum í Grímsnesi fagnaði 90 ára afmæli árið 2020. Listaverk eftir listafólkið sem búsett er að Sólheimum hafa löngum heillað þá sem hrífast af hispursleysi og einlægni sem einkennir verkin, þeirra á meðal stofnendur Safnasafnsins sem áttu þegar við stofnun þó nokkurn fjölda listaverka eftir listafólk búsett að Sólheimum. Var þannig frá upphafi lagður grunnur að blómstrandi samskiptum með reglulegum sýningum í Safnasafninu í samstarfi við Sólheima. Af einstakri rausn listafólksins hafa mörg verk verið gefin til safnsins að afloknum sýningunum og þegar litið er yfir farinn veg er gaman að sjá fjölbreytnina í verkum listafólksins og skynja kraftinn og gleðina sem býr að baki. Sýningin er framlag Safnasafnsins til hátíðarinnar List án landamæra árið 2020 og 2021.


 

Saumað með þræði tímans

Í Verslun Ásgeirs G. eru sýnd peysuföt sem Magnhildur Sigurðardóttir saumaði árið 2005. Þau eru úr ullarefni, húfan úr flaueli, en svuntan, slifsið og skúfurinn úr silki. Þá eru sýnd um 230 ilmvatnsglös sem Sara Hólm á Akureyri gaf safninu 2018. Glösin eru frá helstu tískuhúsum veraldar og hönnuð af heimsþekktum listamönnum, þar á meðal Salvador Dali og Pablo Picasso.


 

Tjáning augnabliksins í litum og áferð

Í innra rými verslunarinnar, svokallaðri Suðurstofu, sýnir Guðrún Pálína Guðmundsdóttir andlitsmyndir málaðar með akrýllitum. Hún túlkar með markvissri litanotkun og einfaldri teikningu þá margbreytilegu fegurð sem býr í fyrirmyndunum; fólki með fjölbreytta reynslu, lífsviðhorf, stöðu og uppeldi. Líkt og fyrirmyndirnar sjálfar þá eru sum andlitin innhverf og búa yfir ákveðinni dulúð en önnur ágeng og krefjandi og kalla á augnsamband.


 

Bókastofa

Í bókastofunni eru ógrynni bóka og fræðirita um flestar helstu listgreinar, svo sem myndlist, hönnun, arkitektúr, textíl og handverk. Fræðafólk og áhugamenn geta þar einnig fengið aðgang að upplýsingum um safneign, sýningarhald, ritgerðum og rannsóknum Safnasafnsins á alþýðulist og sérstæðum listamönnum. Í bókastofunni eru í ár sýnd verk í safneign; grímur eftir Vilmund Þorgrímsson gerðar úr fuglabringum og öðrum náttúrulegum efnum, og klippimyndir eftir Örn Karlsson, en Örn gaf Safnasafninu nýlega myndverk sín til varðveislu og umfjöllunar.


 

Brúðusafn

Þessi hluti Safnasafnsins sýnir brúður íklæddar þjóðbúningum frá öllum heimshornum. Brúðurnar á sýningunni eru 400 talsins en í safneign eru alls um 800 gripir. Innlendir sem erlendir gestir hafa ánægju af að finna brúður frá heimalandi sínu og fræðast um leið um aðrar þjóðir.

Kærastafólkið

Í ár er í brúðustofunni sérsýning á verkum eftir Jonnu (Jónborgu Sigurðardóttir). Fólkið er prjónað úr garnafgöngum og saumað út í andlitin svo hvert og eitt fái sérstakt útlit. Kærastafólkið er barnslegt en hefur samt öðlast margs konar reynslu og búa andlitin yfir blæbrigðum einlægra tilfinninga og heillandi persónuleika.


 

Samstarf við skóla

Árlega efnir Safnasafnið til samstarfs við grunn- og leikskóla á Eyjafjarðarsvæðinu. Þetta samstarf er hugsað til þess að efla listrænan áhuga og hugmyndaflug barnanna frá unga aldri, en einnig er safninu heiður og ánægja að þátttöku þeirra, lífsgleði og sköpunarkrafti. Í ár sýna börnin í leikskólanum Álfaborg verk sín í blómastofunni inn af brúðusafninu og börnin í Valsárskóla sýna verk sín í anddyrinu. Í ár gerðu gerðu börnin andlit fólks og dýra, enda er það í anda sumarsýninganna að þessu sinni.


 

Augu sem leynast í landinu

Í Vestursal má sjá verk Sigurðar Einarssonar listmálara frá Selfossi sem hóf að mála þegar hann var um sextugt og sinnti þeirri iðju af mikilli elju til hinsta dags. Vöktu málverk hans snemma athygli stofnenda safnsins sem heilluðust af og festu kaup á verkum. Á síðasta ári hlaut Safnasafnið rausnarlega gjöf frá sveitarfélagi Hornafjarðar, rúmlega 300 málverk eftir Sigurð bættust við safneignina og mynda nú sterka heild sem hér er sýnt úrval úr í Vestursal.


 

Það þarf ekki allt að vera beint

Helga Páley Friðþjófsdóttir hefur unnið verk sín í fjölbreytilegan efnivið með teikningu sem grunnstef og útvíkkað mörk miðilsins svo falli að viðfangi hennar hverju sinni.


 

Gaurinn sem prjónar málverk

Loji Höskuldsson hefur vakið eftirtekt fyrir glettin útsaumsverk þar sem teflt er saman kunnuglegu og hversdagslegu myndefni í nýju og óvæntu samhengi.


 

Þvílíkasafnið og Boðberi skynvitanna

Bjarni H. Þórarinsson er löngu landsþekktur fyrir myndverk sín sem byggja á vísindalegu kerfi sem myndbirtist í fögrum rósættuðum teikningum. Kallar Bjarni sig Boðbera skynvitanna en aðferð sína Benduvísifræði. Heildarsafn verkanna ber heitið Þvílíkasafnið.
Goddur (Guðmundur Oddur Magnússon) hefur unnið með Bjarna H. Þórarinssyni til margra ára, tekið fjölda ljósmynda af honum og skrásett gjörninga hans ásamt því að hanna veggspjöld fyrir sýningar og sjónþing Bjarna. Vísirósirnar litfögru á sýningunni eru samvinnuverk Godds og Bjarna.


 

Hérna bý ég og mér líður vel

Arna Guðný Valsdóttir er þekkt fyrir ljóðrænar innsetningar með myndböndum og tónlist. Arna sýnir gjörning sem hún hefur útfært í margvíslegu listrænu samhengi undanfarna áratugi.


 

Með Guði á jaðri tilverunnar

Peter Michael Micari (1943-2017) var Bandaríkjamaður sem rúmlega fimmtugur flutti til Íslands árið 1994 og kunngerði að hann væri nývígður grísk-katólskur biskup, með leyfisbréf í farteskinu, hingað kominn til að flýja öfgana í heimalandinu, miðla af þekkingu sinni og leiða menn í allan sannleika á andlega sviðinu. Á sýningunni má einnig sjá í samspili við verk Peter Michael Micari röð ljósmynda eftir Godd (Guðmund Odd Magnússon) sem sýna Micari við ýmsar helgiathafnir.


 

Berglind Ágústsdóttir

Berglind Ágústsdóttir er þekkt fyrir frumlegan tónlistarflutning og kraftmiklar innsetningar þar sem teikning er jafnan í forgrunni. List hennar má helst líkja við skapandi flæði þar sem hún notar sjálfa sig, teikningar, liti, skúlptúra, myndbönd, innsetningar, gjörninga og tónlist til að miðla því sem henni liggur á hjarta. Verk Berglindar í Safnasafninu tjá gleði og ást í samspili við fjölbreyttar hreyfingar manna og dýra í skærum litum.


Ljósmyndir: www.danielstarrason.com

JÓLIN 2020

JÓLIN 2020

Sæl og glöð og skýr og skörp í anda þegar rökkrið umvefur og gælir við hvern líkamspart og lyftir okkur á kreik eins og fugli sem hefur krækt klónum of lengi á grein í þeirri von að hann sjái fiðrildalirfu síga niður úr laufkrónunni upp í gogginn en áttar sig loksins á því að sumarið er liðið og komið fram yfir vetrarnætur – og í bergstálinu fyrir ofan fölnaðan móann krunkar hrafninn.

En annar fugl flýgur yfir hafið á vorin til að verpa í trénu fyrir utan stofugluggann og ala upp unga sína smá og sjá þá vaxa úr grasi í bókstaflegri merkingu stránna sem hann tíndi upp í sinunni eða lágu fram á steina, hann þenur brjóst og sperrir stél í átt til sinnar heittelskuðu sem þiggur spriklandi góðgætið ofan í galopna víða munna og eru svo spenntir að þeir gætu gleypt egg úr hænu hugsar móðirin á meðan hún liggur á og horfir á myndirnar sem hanga fyrir innan glerið og kalla fram þægilega tilfinningu í hjartanu en dokar þó ekki lengi við þær því brátt fer að kula og vissara að kúra sig niður þegar sólin hverfur fyrir horn.

Já, verum sæl í sinni í dýrð vetrarins þegar bakarar standa glaðbeittir í eldhúsi pattaralegir eins og sykurgljáðar steikur á fati eða búðingur með rjóma og kirsuberi á toppnum til að minna þá á hve bjart er yfir Betlehem og blikar jólatjarna í öllum gluggunum og músíkin í útvarpinu hjá framhjá akandi fólki sendir tóninn í litadýrðinni en er þó áleitnari en í fyrra og kannski verður einhverjum bumbult af því háværa glamri sem er margt úr júrovíson ítala og íslendingar taka upp á arma sína í hugmyndaleysi klakans en þetta verður að fá að ganga yfir eins og farsótt sem engu eirir og splundrar með lævíslegum hætti eins og gengur og gerist en við skulum ekki láta það angra stemminguna að ráði heldur kalla fram minningar sem leynast í djúpinu og varpa týru á sálina og eftirsjána sem er í kallfæri daganna þegar norðurljósin sveifluðust yfir höfðinu á göngunni um landið sem var fannhvítt og hreint en sólin fjarri þau kvöld enda sigin niður á hvelfingunni til að bjarma annars staðar á jörðinni og tunglinu – en skildi eftir kveðju um betri tíma og vaxandi ferðamannastraum til að létta reksturinn í sumar

Bestu þakkir fyrir góða og trausta vináttu og allan velgjörning á liðnum árum – og gleðileg jól

Sýningar 2020

Sýningar 2020

Sýningar 2020

25 ára afmæli Safnasafnsins

Safnið er opið alla daga frá klukkan 10 – 17 fram til 13.september.

Safnasafnið var stofnað árið 1995 af þeim Níelsi Hafstein og Magnhildi Sigurðardóttur og fagnar því 25 ára afmæli á þessu ári. Af því tilefni er á sýningum safnsins þetta árið sýnt fjölbreytt úrval úr safneigninni og skapað létt og leikandi flæði milli sala og hæða. Gróður leikur stórt hlutverk í sýningunum en einnig letur, umhverfismál, huldufólk, barnslegt hugarfar, kjarnar, innsæi og fagurfræði. Kynnt eru verk eftir um 150 þekkta sem óþekkta höfunda til að flagga fjölbreytileika safneignarinnar. 

  • Sýnd eru verk listafólks sem vinnur að list sinni á Sólheimum í Grímsnesi og eru í eigu safnsins en Sólheimar fagna 90 ára afmæli í ár.
  • 200 ár eru síðan að Sölvi Helgason fæddist í Skagafirði og til að minnast þessara 200 ára tímamóta setur Safnasafnið upp sýningu á verkum hans.
  • Magnhildur Sigurðardóttir sýnir kyrtil sem hún saumaði samkvæmt hugmyndum Sigurðar Guðmundssonar málara (1833-1874) sem hann setti fram árið 1870 til að stuðla að endurnýjun íslenska kvenbúningsins.
  • Börnin í Álfaborg sýna verk sín í Blómastofu.
  • Tvær stórar samsýningar opna, önnur heitir Í mannsmynd og samanstendur af 50 verkum sem öll tengjast manneskjunni í einhverri birtingarmynd.
  • Hin ber heitið Gróður jarðar og hugarflugs og hefur sýningarstjórinn Níels Hafstein skapað sannkallaðan töfragarð úr verkum fjölda höfunda.
  • Í bókastofu má sjá myndir úr handritum og brúðusafnið með sínum 400 brúðum er á sínum stað.
  • Hreinn Friðfinnsson vinnur með einkennilegan atburð sem gerðist í safninu.
  • Magnús Logi Kristinsson sýnir ljósmyndir af gjörningum.
  • Guðrún Bergsdóttir sýnir einstök útsaumsverk sín þar á meðal er fyrsta myndin sem hún saumaði út án forskriftar og sú nýjasta.
  • Gunnhildur Hauksdóttir samdi hljóðverk að beiðni safnsins eftir uppdráttum að myndvefnaði eftir Jóhönnu Jóhannsdóttur
  • Helena Ósk Jónsdóttir sýnir teikningar af hestum og hestastyttur í anddyri
  • Níels Hafstein vekur athygli á vatnsskorti og óþægilegum staðreyndum um vistkerfi sjávar í verkum sínum.

    Safnasafninu er heiður af því að vera í samstarfi við Listahátíð í Reykjavík  sem fagnar 50 ára afmæli. Þessi síungu afmælisbörn leiða hesta sína saman á sýningunni Gróður jarðar og hugarflugs. Á sýningunni hefur sýningarstjórinn, Níels Hafstein, skapað sannkallaðan töfragarð sem veitir gestum safnsins margslungna upplifun en 101 listamaður á verk á sýningunni.

    Safnasafnið hefur um árabil verið í góðu samstarfi við Listahátíðina List án landamæra og er heiður að því. Þrjár sýninga sumarsins eru jafnframt á dagskrá hátíðarinnar.

 


Sólheimar 90 ára

Hið óviðjafnanlega sjálfbæra samfélag að Sólheimum í Grímsnesi fagnar 90 ára afmæli í ár. Listaverk eftir listafólkið sem búsett er að Sólheimum hafa löngum heillað þá sem hrífast af hispursleysi og einlægni sem einkennir verkin, þeirra á meðal stofnendur Safnasafnsins sem áttu þó nokkurn fjölda listaverka frá Sólheimum við stofnun safnsins. Var þannig frá upphafi lagður grunnur að blómstrandi samskiptum með reglulegum sýningum í Safnasafninu í samstarfi við Sólheima. Að afloknum sýningunum hafa mörg verkanna verið gefin til safnsins og þegar litið er yfir farinn veg er gaman að sjá fjölbreytnina í verkum listafólksins og skynja gleðina og kraftinn sem býr að baki. Sýningin er framlag Safnasafnsins til hátíðarinnar List án landamæra og stendur í tvö ár.


Verslunin

Í ár er sýndur kyrtill sem Magnhildur Sigurðardóttir saumaði samkvæmt hugmyndum Sigurðar Guðmundssonar málara (1833-1874) sem hann setti fram árið 1870 til að stuðla að endurnýjun íslenska kvenbúningsins.

Þá eru sýnd um 230 ilmvatnsglös sem Sara Hólm á Akureyri gaf safninu 2018. Glösin eru frá helstu tískuhúsum veraldar og hönnuð af frægum listamönnum, þar á meðal Salvador Dali og Pablo Picasso.


Suðurstofa

Í innra rými verslunarinnar, svokallaðri Suðurstofu, er sýningin Í mannsmynd. Á sýningunni má sjá meira en 50 verk úr safneign Safnasafnsins eftir rúmlega 30 ólíka listamenn. Sum verkin eru gamlir kunningjar og hafa verið sýnd áður í öðru samhengi — en önnur hafa aldrei fengið tækifæri til að sýna sig. Í öllum verkunum má sjá útlínur manneskjunnar og bregður fyrir í sumum þeirra kynjasýnum á mörkum mennskunnar. Safnasafnið hefur frá upphafi lagt ríka áherslu á fjölbreytta tjáningu á sjálfi listamanna, hvort sem hún birtist í þeirra eigin spegilmynd eða á sér aðrar birtingarmyndir.


Bókastofa

Í bókastofunni eru í ár sýndar myndir, skrift- og leturdæmi úr handritum sem varðveitt eru í handritadeild Landsbókasafns Íslands. Eru þessi verk hluti af yfirgripsmiklu rannsóknarverkefni sem unnið var árið 2003 af Ásrúnu Kristjánsdóttur og fjallaði um myndlýsingar sem finna má í fornum íslenskum handritum. Fékk Safnasafnið 78 verk úr rannsókninni að gjöf árið 2008.


Brúðusafn

Í brúðusafni Safnasafnsins má sjá brúður íklæddar þjóðbúningum frá öllum heimshornum. Brúðurnar á sýningunni eru 400 talsins en í safneign eru alls um 800 gripir. Innlendir sem erlendir gestir hafa ánægju af að finna brúður frá heimalandi sínu og vilja um leið fræðast um aðrar þjóðir.


Samstarf við skóla

Í ár sýna börnin í leikskólanum Álfaborg verk sín í blómastofunni inn af brúðusafninu. Árlega efnir Safnasafnið til samstarfs við grunn- og leikskóla við austanverðan Eyjafjörð. Þetta samstarf er hugsað til þess að efla listrænan áhuga og hugmyndaflug barnanna frá unga aldri, en einnig er safninu heiður og ánægja að þátttöku þeirra, lífsgleði og sköpunarkrafti.


Blómstur – Sölvi Helgason í 200 ár

Listamaðurinn Sölvi Helgason (1820-1895) fæddist að Fjalli í Sléttuhlíð í Skagafirði árið 1820 og til að minnast þessara 200 ára tímamóta setur Safnasafnið upp sýningu á verkum hans. Sölvi Helgason, eða Sólon Íslandus eins og hann kallaði sig líka, var af fátæku fólki kominn og lifði þá tíma þegar íslensku alþýðufólki voru settar skorður með vistarbandi og takmörkuðu ferðafrelsi. Sölvi gerði uppreisn gegn þessum reglum, ferðaðist um landið og leit á sig sem sjálfmenntaðan listamann og fræðimann. Fyrir það uppskar hann hýðingar og fangelsisdóma. Á sama tíma og Sölvi var á faraldsfæti og átti í útistöðum við yfirvöld skapaði hann einstæð listaverk sem einkennast af blómskrúði og blómafléttum. Sölvi var einnig sískrifandi og smágerð skrift hans þekur iðulega bakhlið myndverka og eins ritaði hann athugasemdir inn á sjálfar myndirnar. Listrænt vægi og gæði myndverka Sölva Helgasonar er óumdeilanlegt, þó ekki hlyti hann viðurkenningu í lifandi lífi, og í dag getum við ekki annað en dáðst að sköpunarverki þessa fátæka förumanns.

Á sýningunni eru sýnd ellefu áður óþekkt verk eftir Sölva Helgason sem varðveist hafa í Danmörku. Einlægar þakkir fyrir að lána verkin á sýninguna fá eigendur þeirra; Birgitte Herbert Nielsen, Hanne Hendil, Jesper Herbert-Nielsen, Kirsten Herbert Rønnebek og Lisbeth Herbert Møller.


Gróður jarðar og hugarflugs

Á þessari sýningu hefur sýningarstjórinn, Níels Hafstein, skapað sannkallaðan töfragarð í þeim tilgangi að kynna listaverk og gripi úr safneign eftir sem flesta höfunda og sýna ólíkar hugmyndir þeirra, aðferðir og efnisval. Fjallað er um tún, úthaga, þúfur, tré og runna, blóm, ávexti og grænmeti. En þó gróðurinn sé í aðalhlutverki eru verkin á sýningunni ekki einskorðuð við hann, því menn og dýr koma við sögu í nálægð augans eða fjarvídd landslagsins. Þá býr ýmislegt óvænt að baki eða er innan seilingar. Settar eru fram andstæður og samstæður, stærðir, form, litir, slétt og gróf áferð til að fá heild á hvern vegg, sem tengjast svo með áherslum og sjónlínum um rýmið, þjappa verkunum saman og veita gestum safnsins margslungna upplifun. Sýningin er á dagskrá Listahátíðar í Reykjavík. 


Hreinn Friðfinnsson

Í fínlegum og ljóðrænum verkum sínum vinnur Hreinn Friðfinnsson með ljósmyndir, texta, sögur og sagnir, drauma og yfirnáttúruleg fyrirbæri, og oft eru verkin með léttum húmorískum undirtón. Á sýningunni í Safnasafninu vinnur Hreinn meðal annars með einkennilegan atburð sem átti sér stað í Safnasafninu fyrir alllöngu, sem vísar til og styrkir þá trú og skoðun margra að í nágrenni þess séu huldufólksbyggðir.


Magnús Logi Kristinsson

Í listsköpun sinni hefur Magnús Logi einkum lagt áherslu á gjörninga og í meðförum hans verður tungumál og líkami að þrívíðum og byggingarfræðilegum listflutningi. Á sýningunni í Safnasafninu eru ljósmyndir af ýmsum gjörningum Magnúsar Loga þar sem hann notar líkama sinn eins og skúlptúr, hreyfist varla og leyfir áhorfendum að koma og fara að vild á meðan á gjörningnum stendur.


Gunnhildur Hauksdóttir og Jóhanna Jóhannsdóttir

Gunnhildur Hauksdóttir býr jöfnum höndum til tvívíð verk, skúlptúra, innsetningar, hljóðverk, myndbönd og gjörninga og blandar þeim miðlum gjarnan saman. Safnasafnið bað Gunnhildi um að semja hljóðverk við uppdrætti fyrir myndvefnað eftir Jóhönnu Jóhannsdóttur sem eru í eigu Safnasafnsins. Í hljóðverkinu er stuðst við slátt vefstóls með söngröddum lögðum yfir vefmunstrin og í uppsetningu sýningarinnar er leitast við að kalla fram hreyfingu og flæði í takt við þann hljóðheim sem Gunnhildur hefur skapað. Saman mynda þessi ólíku form sjálfstæða margslungna heild sem brúar bilið á milli miðla og ólíkra kynslóða.

Jóhanna Jóhannsdóttir (1918-1985) fæddist á Hellissandi á Snæfellsnesi og ólst þar upp við hannyrðir og saumaskap. Hún stundaði nám við Húsmæðraskólann á Laugalandi í Eyjafirði og hélt síðan til framhaldsnáms við Statens Håndverks- og Kunstindustrihøgskole í Noregi. Eftir hana liggur listvefnaður, rýjateppi og útsaumur en einnig vandaðar vinnubækur með munstrum, vefsýnishornum og frumdrögum að stærri verkum.


Helena Ósk Jónsdóttir

Helena Ósk Jónsdóttir (f. 1999) þróaði fljótt með sér afar sérstakan stíl í teikningu, einkum í myndum af hestum sem hún kynntist í æsku og hefur mikið yndi af. Helena Ósk hefur góða tilfinningu fyrir stemningu og biður oft nærstadda að hlusta á áhöldin þegar hún teiknar, að nema skrjáf í blaði og hvernig blýantur og litir ferðast um það. Á sýningunni er raðað saman teikningum, skúlptúrum og fjöldaframleiddum plasthestum sem Helena Ósk hefur farið fimum höndum um og sveigt að listrænum kröfum sínum. Er ástríða hennar og næmi fyrir dýrum augljós og kemur sterklega fram í myndum hennar.


Guðrún Bergsdóttir

Guðrún Bergsdóttir byrjaði að vinna að útsaumslist sinni eftir þrítugt en þá fór hún að nota nál, garn og striga á persónulegan hátt. Áður hafði Guðrún unnið tússmyndir sem svipar um margt til útsaumsmynda hennar. Frá árinu 2000 til ársins 2018 saumaði Guðrún samtals 66 myndir án forskriftar og er úrval þeirra sýnt á sýningunni hér í Safnasafninu, þar á meðal fyrsta myndin sem hún saumaði út og sú síðasta. Þróaði Guðrún sérstakan stíl sem vakti aðdáun og höfðaði til fólks á ólíka vegu, en verk hennar tengjast bæði handverkshefðinni og geómetríski abstrakt list. Líkt og Safnasafnið ávarpa verk Guðrúnar manngerð landamæri listheimsins þar sem múrar hafa verið reistir og verk eru vegin og metin eftir ósögðum en vel þekktum reglum um gildi ólíkra verka og skapara þeirra.


Níels Hafstein

Níels Hafstein hefur um langt árabil verið brautryðjandi í íslensku myndlistarlífi, bæði sem sjálfstætt starfandi myndlistarmaður og sem aflvaki í margvíslegu menningarlífi. Á sýningu sinni stillir hann upp teikningum, ljósmyndum, málverkum, filmum og skúlptúrum á fagurfræðilegan hátt og setur í frumlegt samhengi til að vekja athygli á vatnsskorti og óþægilegum staðreyndum um vistkerfi sjávar

Sýningar 2019

Sýningar 2019

Sumarið 2018 ákvað Safnasafnið að setja upp tveggja ára sýningu á 360 fuglum
úr safneign sinni, sem geymir um 600 fugla alls. Fuglar eru táknmyndir frelsis og
boðberar sumars, þeir svífa yfir land og sjó, fjöll og firnindi og yfir úthöfin breið, og
tengja með ferðalögum sínum stað við stað og land við land.

Samstarf við skóla
Haldið er upp á 20 ára samstarf safnsins við Valsárskóla með verkefninu
Heimabyggð, en í því taka líka þátt elstu börnin í Leikskólanum Álfaborg á
Svalbarðseyri.

Verslunin
Í ár er sýndur upphlutur sem Magnhildur Sigurðardóttir saumaði samkvæmt
hugmynd sem Sigurður Guðmundsson málari [1833-1874] kynnti 1870. Þá eru
sýnd um 230 ilmvatnsglös sem Sara Hólm á Akureyri gaf safninu 2018. Glösin
eru frá helstu tískuhúsum veraldar og hönnuð af frægum listamönnum, þar á
meðal Pablo Picasso.

Í innra rými verslunarinnar, svokallaðri Suðurstofu, sýnir Atli Már Indriðason í
Reykjavík málverk og teikningar. Atli Már var kjörinn „Listamaður ársins 2019“ á
hátíðinni List án landamæra. Í sama sal er einnig sýning á vefnaði sem Guðrún Hadda Bjarnadóttir frá
Fífilbrekku í Eyjafjarðarsveit vann eftir stækkuðum teikningum sona sinna og
sonarsona.

Í bókastofunni eru ógrynni fræðirita og bóka um flestar helstu listgreinar, svo sem
myndlist, hönnun, arkitektúr, textíl og handverk. Fræðafólk og áhugamenn geta
þar einnig fengið aðgang að upplýsingum um sýningarhald, safneign og
rannsóknir Safnasafnsins á alþýðulist og sérstæðum listamönnum.


Í bókastofunni eru í ár sýnd leirverk eftir ókunna höfunda, gerð á vinnustofu
Kleppsspítala árin 1980-1983. Stofnendur Safnasafnsins unnu bæði í Víðihlíð á
þessum árum og fengu þau verkin að gjöf frá listafólkinu eða keyptu þau á
árlegum basar.

Brúðusafn Doll Collection
Í brúðusafni Safnasafnsins má sjá brúður íklæddar þjóðbúningum frá öllum heims
hornum. Brúðurnar á sýningunni eru 400 talsins en í safneign eru alls um 800
gripir.

Auður Lóa Guðnadóttir
Leikfimi / Sport series 2018-2019
Auður Lóa Guðnadóttir er myndlistarmaður sem leikur sér á landamærum hins hlutlæga og huglæga, skúlptúrs og teikningar, listar og veruleika. Á sýningunni í Safnasafninu eru verk úr skúlptúrseríunni Leikfimi sem Auður Lóa hefur unnið að síðastliðið ár, en þar tvinnast saman mörg hugðarefni hennar: fagurfræði, félagsleg hegðun, internetið og níundi áratugurinn. 

Eygló Harðardóttir
Grímur / Masks  2018-19
Eygló Harðardóttir vinnur gjarnan tví- og þrívíða abstrakt-skúlptúra, innsetningar og bókverk. Hráefni eins og nýr eða endurnýttur pappír, litríkt fundið efni, plast, viður, grafít og gler, leggja grunn að hugmyndum Eyglóar og eru drifkraftur til að kanna miðilinn hverju sinni. Sköpunarferli Eyglóar einkennist af rannsókn og könnun á efninu, þar sem möguleikar og takmarkanir þess eru kortlögð og auðkenni þess rannsökuð. Eftir stendur sjónræn niðurstaða sem er afsprengi ferils þar sem efnið hefur ráðið för, það er teygt og því breytt og fengið annað hlutverk.

Steingrímur Eyfjörð
Sýnir verkið Kynjamyndir en það var fyrst sýnt á Feneyjartvíæringnum árið 2007, þar sem Steingrímur var fulltrúi Íslands. Á sýningunni vann hann á skapandi hátt með ólík minni, tengd þjóðfræði og sögu Íslands. 

Þórður Guðmundur Valdimarsson – Kiko Korriro (1922–2002)
Árið 2015 gaf fjölskylda Þórðar Safnasafninu meginhluta ævistarfs hans, um 120.000 verk. Var strax árið 2016 sett upp sýning sem sýndi umfang þessarar áhugaverðu nýju safneignar. Nú í sumar eru sýndar klippimyndir sem eru fengnar að láni frá ættingjum, auk verka úr safneign, m.a. teikningar, skúlptúrar og ljósmyndir sem voru teknar af Þórði þegar hann dvaldi ungur maður í Los Angeles og hitti nokkrar af þekktustu kvikmyndastjörnum þess tíma. Undanfarin fjögur ár hefur Níels Hafstein kannað ítarlega hluta af myndverkum Þórðar og birtist rannsókn hans í bók sem gefin er út í tengslum við sýninguna.

Valdimar Bjarnfreðsson – Vapen
Valdimar Bjarnfreðsson var óvenjulegur myndlistarmaður, því við myndsköpun sína beitti hann sömu aðferðum og þegar spáð er í bolla. Hann hélt yfir tug málverkasýninga og bar ein þeirra hinn skemmtilega titil „Kaffibollinn er mitt Internet“. Tengsl Valdimars við dulræn öfl fór hann ekki leynt með og í kaffibollanum birtust honum myndir þar sem fólgið var svar að handan við spurningum hans um hin ýmsu málefni. Verk Valdimars eru einföld og bernsk í framsetningu, litir skærir, formin einfölduð og fletir einlitir. 

Rúna Þorkelsdóttir
Paperflowers
Bókverkið Paperflowers vann Rúna á vinnustofu sinni í Amsterdam á svokallaða Rota-print-prentvél og var verkið gefið út í 100 árituðum og innbundnum bókum árið 1998. Jafnframt voru 10 eintök ef hverri mynd höfð laus í möppum og seldist útgáfan fljótt upp. Árið 2007 keypti Tao Kurihara, hönnuður hjá tískuhúsinu Comme des Garcons, Paperflowers í bókverkabúð í Tokyo. Hafði hún samband við Rúnu og hófst þá skapandi samvinna þeirra við gerð fataefnis útfrá verkunum. Þær völdu myndir og skeyttu saman beint, án þess að nota myndvinnsluforrit, svo greinilega sést að myndirnar eru í upprunalegri A4-stærð með hvítum röndum á milli. Tao Kurihara hannaði síðan sumarlínu úr fataefnunum sem var kynnt á tískusýningu í verslun Comme des Garcons í París 2008. Fatalínan vakti athygli, var fjallað um hana í helstu tískutímaritum og meðal kaupenda úr línunni var Michelle Obama forsetafrú Bandaríkjanna.

 

 

JAHÉRNA! Nordic Outsider Craft
Sýningin JAHÉRNA! er norræn sýningarröð sem ferðast milli Finnlands, Danmerkur, Svíþjóðar, Íslands og Noregs frá 2018 til 2020. Sýningin opnar í Safnasafninu þann 13. júlí 2019.

Á sýningunni má sjá verk þar sem unnið er með hefðbundnar handverksaðferðir, til dæmis prjón, hekl og útsaum af ýmsu tagi, en einnig verk unnin úr plastpokum, leir og tré. Verkin á sýningunni eru valin af finnsku sýningarstjórunum Elina Vuorimies og Minna Haveri. Hver sýningarstaður krefst nýrrar nálgunar við uppsetningu verkanna, en markmið sýningarstjóranna er að sýna þá fjölbreytni og leikgleði sem fólgin er í verkum einfara og hvernig þeir nota tækni og efni á nýstárlegan hátt.

Listamennirnir sem eiga verk á sýningunni eiga sér ólíkan bakgrunn, sumir eru fatlaðir eða með sérstakar þarfir, en aðrir ekki. Það sem sameinar þá er að vinna með hefðbundið handverk út frá eigin hugkvæmni og hugmyndaflugi.

Safnasafnið er, líkt og aðrir þátttakendur í sýningaröðinni, meðlimur í samtökunum European Outsider Art Association, EOA, sem myndar tengslanet milli stofnana sem safna og sýna list einfara.
Aðrir samstarfsaðilar eru / Other institutions cooperating are: The Craft Museum, Jyväskylä, Finland / Bifrost FOF-Artschool, Randers, Denmark / Art Gallery Filosoffen, Odense, Denmark / Inuti, Stockholm, Sweden / Aguélimuséet, Sala, Sweden / Trastad Museum, Harstad, Norway / Galleri NordNorge, Harstad, Norway / K.H.Renlund Museum, Kokkola, Finland.

 

Pin It on Pinterest