Safnasafnið vinnur áfram samkvæmt jafnréttisstefnu. Á 10 ára afmæli þess 2005 var sett upp viðamikil sýning, Myndgaldur, þverskurður safneignar, með verkum eftir 160 höfunda, 80 konur og 80 karla, lærða og leika til skiptis, þ.á.m. fólk með Alzheimer og Parkinssons, misþroska einstaklinga eða fatlaða til líkama og sálar. Safnið hefur átt farsælt samstarf við Sólheima í Grímsnesi, einnig Geðlist og Fjölmennt á Akureyri og til skoðunar er að taka upp samvinnu við Hæfingarstöðina þar, svo þessi mikilvægi þáttur í starfseminni eflist og dafni og fordómar minnki í samfélagi manna
Safnasafnið efnir til könnunar á meðal gesta 2010 með spurningum sem byggja á niðurstöðum Safngestaráðs
Safnasafnið stefnir að því að birta á vefsíðu sinni grein um íslenska alþýðulist og myndskreytta skrá um höfundana
Safnasafnið heldur áfram tilraunum með sýningarform og byltingarkennda framsetningu á nytjahlutum og gripum svo þeir mynda órofa listheild; það efnir til sérstakra sýninga og kynninga á vefsíðu sinni
Safnasafnið leggur áherslu á samstarf við félög og stofnanir misþroska, einhverfra og geðfatlaðra einstaklinga
Safnasafnið óskar eftir því að fá beinan aðgang að gagnagrunni Landsbókasafnsins um teikningar í handritum sem það getur notað við undirbúning ritraðar um alþýðulist frá upphafi handritagerðar á Íslandi fram til 21. aldar
Safnasafnið býður sérfræðingum og alþýðlegum fræðimönnum aðstöðu til að rannsaka tengsl og þróun gamalla handritamynda og alþýðulistar líðandi stundar, einnig til ótilgreindra rannsókna á söfnun almennt
Safnasafnið skráir verk látinna alþýðulistarmanna sem eru í eigu erfingja, listasafna og einkasafnara, og gefur út uppsláttarrit um þá og verk þeirra
Safnasafnið efnir til rannsókna og skrifa um alþýðulist og alþýðuhandverk, aðferðir, verklag, söfnun og varðveislu
Safnasafnið lætur kvikmynda listamenn að störfum og taka stutt viðtöl við þá. Það sýnir myndirnar í safninu þegar fram líða stundir
Safnasafnið efnir til rannsókna í samvinnu við sérfræðinga um ættbundna hæfileika til listsköpunar. Sem dæmi má nefna, að í Húnaþingi vestra eru alþýðulistarmenn hlutfallslega fleiri en annars staðar á landinu og væri gaman að fá skýringu á því
Safnasafnið undirbýr könnun á alþýðulist í félagsstarfi nýbúa, einnig fanga, öryrkja og aldraðra
Safnasafnið leitar eftir samstarfi við nemendur Háskólans á Akureyri, um að þeir taki að sér rannsóknarverkefni með styrk frá Nýsköpunarsjóði námsmanna, þar sem fjallað verður um: sveitarfélagið og íbúa þess, menningu og félagslíf, búskap og ræktun, útveg, sjóflutninga, vegagerð og samgöngur, verslun og þjónustu, staðhætti, umhverfi, veður- og náttúrufar, jarðfræði, plöntur, fugla, þjóðsögur og ævintýri. Þá verður efnt til samstarfs á grundvelli hugmynda nemenda og skóla. Niðurstöðurnar ásamt myndefni og gripum verða kynntar í Svalbarðsstrandarstofu
Safnasafnið býr til litlar sýningar og dagskrár sem hægt er að fara með í grunnskólana og aðrar stofnanir. Það efnir til stuttra námskeiða í Hugmyndasmiðju æskunnar
Safnasafnið vinnur úr tilgátunni Hringferli myndlistar, 16 þátta greiningarkerfi eftir Níels Hafstein, sem er notað við tölvuskráningu á listaverkum safnsins, og gefur niðurstöðurnar út á bók til leiðbeiningar fyrir fagfólk og almenning
Safnasafnið efni til nýsköpunarvinnu í alþýðlegri minjagripagerð sem byggir á menningararfi íslendinga. Í fyrstu verði gerðir flokkar um drauga og þjóðsagnadýr, en síðar hlutir sem hafa skírskotun til eldri og yngri gilda í þjóðlífinu
Safnasafnið hefur hug á því að veita alþýðulistarfólki, alþýðuhandverksfólki og alþýðusöfnurum viðurkenningar (sem æskilegt væri að menntamálaráðherra afhenti)
Safnasafnið starfrækir Safngestaráð, hið fyrsta á Íslandi, sem mun hafa víðtæk áhrif á alla starfsemi þess
Safnasafnið setur íslenska alþýðulist í alþjóðlegt samhengi, kynnir hana í erlendum fagtímaritum og efnir til samstarfs við erlend listhús og listasöfn um skiptisýningar og aðra starfsemi. Reynt hefur verið að koma upplýsingum á framfæri, m.a. inn í Chronology í Source Book sem tímaritið Raw Vision gefur út (Raw Vision, London - New York - París, er virtasta tímarit um alþýðulist í heiminum í dag, verðlaunað af Sameinuðu þjóðunum, og hefur óskað eftir því að fá til birtingar grein um Alþýðulist Íslands)
Safnasafnið stefnir að því að fólk komi gagngert til landsins til að heimsækja safnið, og að það verði ein af mest sóttu stofnunum í menningartengdri ferðaþjónustu á Íslandi. Það vill stuðla að því að alþýðulist á Íslandi njóti alþjóðlegrar frægðar og viðurkenningar
