Konur hafa frá stofnun safnsins 1995 verið í meirihluta í stjórn þess. Unnið er skv. jafnréttisstefnu; kynjahlutfall á sýningum er haft sem jafnast; og leitast er við að ná til utangarðsfólks eða listamanna á stofnunum vítt og breitt um landið
Fyrsta sýning safnsins í Þinghúsinu á Svalbarðsströnd hét 1. maí, innsetning sem fjallaði um starf ungrar stúlku á sjúkrahúsi um miðja síðustu öld og var líf hennar fyrr og nú tengt saman með tækjabúnaði stofnunarinnar, bréfi og einkamunum. Var þetta í fyrsta skipti í sögu myndlistar á Íslandi sem safnmunir voru settir í svo einkalegt samhengi og gaf tóninn út í lista- og safnalífið
Ein af deildum safnsins er Verslun Ásgeirs G. Gunnlaugssonar & Co, sem stofnuð var 2007 í Austurstræti 1 í Reykjavík, en lauk starfsemi sinni í Skipholti 9 árið 2006. Í henni er síbreytileg kynning á þeim vörum sem alla jafna höfða meira til kvenna en karla, jafnframt er sett upp lítil sýning ár hvert með handverki kvenna. Sú fyrsta var 2007 á kjólum eftir Kristínu Jónsdóttur, eiginkonu Einars Braga, skálds; önnur 2008 á nálapúðum eftir Hannyrðasystur í Eyjafirði, sem kölluðust á við úrval af nálhúsum og nálapúðum í eigu safnsins; 2009 var sýning á fatnaði sem Þóra Björk Sveinsdóttir á Akureyri saumaði á tvær ungar dætur sínar fyrir 50 árum; og 2010 sýning á "harðangri og klaustri" eftir Þórveigu Sigurðardóttur frá Sleitustöðum í Skagafirði, sem haustið 2009 gaf dúk á altari Hóladómkirkju. Safnasafnið fékk veður af Hildi Kristínu Jakobsdóttur á Akureyri sem þjáð var af Parkinssonveiki en stundaði útsaum af veikum mætti, önnur hönd hennar hafði misst máttinn og varð hún því að draga nálina út með tönnunum. Safnið keypti af henni 24 verk og hélt sérsýningu á þeim 2002, og lánaði síðan nokkur þeirra á Alþjóðlegu textílsýninguna á Kjarvalsstöðum 2004
Alþýðulistarkonur eru sérstaklega hvattar til dáða, og verk þeirra sýnd í grennd við verk nútímalistarkvenna. Í safninu eru t.d. verk sem voru sérstaklega pöntuð til að ýta við konunum, fá þær til að sjá sig í bjartsýnu ljósi og máta sig við aðrar konur
